வை ராஜா வை விமர்சனம் – அவரை காமெடி பீசும் ஆக்கியிருக்கிறார்கள்

3 படத்தை இயக்கி திறமை காட்டிய ஐஸ்வர்யா தனுஷ் இயக்கத்தில் வெளியாகியிருக்கும் 2வது படம் வை ராஜா வை. மே தினத்தில் வெளியாகியிருக்கும் வை ராஜா வை ஆட்டம் எப்படி இருக்கிறது…?

அடுத்து நடக்கக் போவதை முன்பே தெரிந்து கொள்ளும் அசாதாரணமான ஒரு திறன் கார்த்திக் (கவுதம் கார்த்திக்)க்கு இருக்கிறது. இந்த திறன் குறித்து அவனது சிறு வயதிலேயே தெரிந்து கொள்ளும் கார்த்திக்கின் அப்பா, அதை எந்த ஒரு நேரத்திலும் பயன்படுத்தக் கூடாது என்று சத்தியம் வாங்கிவிடுகிறார். படித்து விட்டு வேலை தேடும் கார்த்திக்குக்கு அவனது நண்பன் சதீஷ் (சதீஷ்) மூலமாக அவன் வேலை பார்க்கும் நிறுவனத்திலேயே வேலையும் கிடைக்கிறது. தான் வேலை பார்க்கும் நிறுவனத்தை நிறுவன கணக்கு விஷயத்தில் தன் திறனை பயன்படுத்தி பிரச்சினையில் இருந்து தப்ப வைக்கிறார் கார்த்திக். இந்த சம்பவத்தினால் இவருடன் வேலை பார்க்கும் பான்டா (விவேக்)க்கு கார்த்திக்கிடம் இருக்கும் தனித் திறன் பற்றி தெரிந்துவிடுகிறது. கிரிக்கெட் சூதாட்டத்தில் பணத்தை இழந்து தவிக்கும் பான்டா கார்த்திக்கை பயன்படுத்தி தான் இழந்த பணத்தை மீட்க நினைக்கிறார். கார்த்திக்கிடம் பேசி தனக்காக சூதாட்டத்தில் கலந்து கொள்ள வைக்கிறார். சூதாட்டத்தில் விளையாடி ஏகப்பட்ட பணம் ஜெயிக்கிறார்கள். இனிமேல் சூதாட்டத்தில் கலந்து கொள்ள கூடாது என்று முடிவு எடுக்கும் கார்த்திக்கை சூதாட்டத்தை நடத்தும் பாலாஜி மீண்டும் சூதாட்டத்தில் கலந்து கொள்ள வற்புறுத்துகிறார். இல்லையென்றால் கார்த்திக்கின் காதலியையும் குடும்பத்தையும் போட்டுத் தள்ளிவிடுவேன் என்று சொல்லி மிரட்டும் பாலாஜிக்காக சூதாட்டத்தில் கார்த்திக் கலந்து கொண்டானா? பாலாஜி பிடியில் இருந்து தப்பித்தானா? என்பது மீதி கதையும்… தொடர்வது போன்று முடியும் முடிவும்…
vai-raja-rajaபாடல் காட்சியுடன் துவங்குகிறது படம். அடுத்து கார்த்திக் யார்… எப்படிப்பட்டவன் என்கிற காட்சிகள் கவுதம் கார்த்திக்கின் குரலுடன் வந்து விழுகின்றன. படத்தின் முதல் பாதி விறுவிறுப்பாக நருகிறது. இரண்டாவது பாதியில் டேனியல் பாலாஜி கவுதம் கார்த்திக்கை மிரட்டி கப்பலில் சென்று சூதாட்டத்தில் கலந்து கொள்ள வைப்பது போன்ற காட்சிகள், அதுவும் கொஞ்சம் சீரியஸ் கலந்தவை. ஆனால் இந்த காட்சிகளில் விறுவிறுப்பு பஞ்சமாகியிருக்கிறது.

அப்பாவி இளைஞன், ஆக்க்ஷன் ஹீரோ கேரக்டருக்கு கவுதம் கார்த்திக் ஓரவுக்கு செட் ஆகியிருக்கிறார். கதாநாயகியாக ப்ரியா ஆனந்த். முதல் பாதியில் ஆங்காங்கே வந்து முகம் காட்டி பாடலுக்கும் ஆடுகிறார். இரண்டாவது பாதியில் அம்மணியை தேடித்தான் பார்க்க வேண்டியிருக்கிறது. வண்டியில் வந்து இரண்டு பேரை இடித்துத் தள்ளிவிட்டு அவர்கள் ஒரு செடி மீது விழுந்து விட விழுந்து விட்டவர்களைக் கை தூக்கி விடாமல் செடியைப் பார்த்து உச் கொட்டி தடவி விடுவது கொஞ்சம் டூமச்சான காட்சிதான். கவுதம் கார்த்திக்கு அக்காவாக நடித்திருக்கிறார் காயத்ரி ரகுராம். ஆன்டி மாதிரி இருக்கும் அவருக்கு கல்யாணம் நடக்கிறது. இது முதல் கல்யாணமா? அல்லது இரண்டாவது கல்யாணமா என்னும் சந்தேகம்தான் ரசிகர்களுக்கு. இயக்குநர் அதை நிவர்த்தி செய்யுற மாதிரி ஏதாவது காட்சி வைத்திருக்கலாம். அக்காவின் கல்யாண செலவுகளுக்காக அப்பாவுக்கு செய்து கொடுத்திருந்த சத்தியத்தையே மீறுகிறார் கவுதம் கார்த்திக். அதற்கு வலுவான காட்சிகளை ஏதும் வைக்காமல் விட்டிருக்கிறார் இயக்குநர். அப்பாவாக வசந்த், அம்மாவாக ஸ்ரீரஞ்சனி டெம்ப்ளேட் அப்பா அம்மா. நண்பனாக வருகிறார் சதீஷ். படத்தின் ராஜா விவேக்ன்னு கூட சொல்லலாம். முதல் பாதியில் கலகலக்க வைக்கிறார். பான்டா கேரக்டரில் வரும் இவர் பேசும் வசனங்கள் ரசிகர்களிடம் பெரும் வரவேற்பைப் பெற்றிருக்கின்றன. விவேக் வரும் பெரும்பாலான காட்சிகளில் சிரிக்க முடிகிறது. சாலையில் போடப்பட்டிருக்கும் வேகத்தடைகள், கோவாவில் குடிக்கும் போது மது நாட்டுக்கு உயிருக்கு கேடு என்று அட்டையில் எழுதி வைத்து கொள்வது என சில இடங்களில் சமூக நலன் கலந்து இவர் பேசும் வசனங்களுக்கு திரையரங்குகளில் ரசிகர்கள் மத்தியில் செம வரவேற்பு. எம்எஸ் பாஸ்கர், மனோபாலா கேரக்டர்களும் ‘உள்ளேன் ஐயா’ சொல்லிப் போகிறார்கள். வில்லனாக வரும் டேனியல் பாலாஜி டெரர் முகம் காட்டுவதாக ஆரம்பித்தாலும் அவரை அறியாமலேயே அவரை காமெடி பீசும் ஆக்கியிருக்கிறார்கள். குறிப்பாக திருமண மண்டபத்தில் கார்த்திக்கின் அப்பா, அம்மா என அனைவரது பின்னாலும் டேனியல் பாலாஜியின் ஆள்கள் நிற்பதும்… அப்போது அவர் அலைபேசியில் பேசும் வசனங்களும்.

ஒரே ஒரு பாடலுக்கு வந்து ஆட்டோக்காரனாக ஆட்டம் போடுகிறார் எஸ்ஜெ சூர்யா. இவருக்கு தன்கிட்ட இருக்கும் திறமை இவருக்கே தெரியாது போலிருக்கு. நல்ல படங்கள் குடுப்பாரு என்று எல்லாரும் இவரை எதிர்நோக்கியிருக்க மனுஷன் இந்தப் படத்தில ஒரு பாடலுக்கு இடுப்பை வளைச்சு குத்தாட்டம் போட்டுட்டுப் போறாரு. இறுதிக் காட்சிகளில் கொக்கி குமாரு கேரக்டரில் என்ட்ரி கொடுத்திருக்கிறார் தனுஷ். ஆடுகளம் படத்தில் நடிச்சா பொண்ணா அது…? ஸ்ரேயா (டாப்ஸி) கேரக்டரில் நடிச்சிருக்கு… இன்னும் ரெண்டு படத்தில் இது மாதிரி கேரக்டரில் நடிச்சா அதற்கு அடுத்த படங்களில் அம்மணியை நிச்சயம் அக்கா அண்ணி கேரக்டரில் நடிச்ச வெச்சிருவாங்க…

யுவன் ஷங்கர் ராஜா இசை. கவுதம் கார்த்திக் நடிப்பில் வெளிவந்த படத்தில் இடம் பெற்ற முட்டாளாய் முட்டாளாய் பாடலின் இடையில் வரும் இசையையே இந்தப் படத்திலும் சில இடங்களில் பயன்படுத்தியிருக்கிறார். தனுஷ் என்ட்ரி கொடுக்கும் காட்சியில் புதுப்பேட்டை தீம் மியூசிக்கை ஓட விட்டு சைலன்ட் செய்திருக்கிறார்.  அதற்கு பேசாமல் அந்த தீம் மியூசிக்கையே முழுதாக ஓடவிட்டிருக்கலாம். பாடல்கள் பெரிதாக கவரவில்லை. பின்னணி இசை மட்டும் கொஞ்சம் தப்பிப் பிழைத்திருக்கிறது.

காட்சிகளோடு இணைந்து தலையசைத்திருக்கும் ஒளிப்பதிவும் எடிட்டிங்கும் ஓகே ரகம். படத்தை இயக்கியிருக்கிறார் ஐஸ்வர்யா தனுஷ். 3 படத்தில் பாருக்குள் வைத்து தாலி கட்டும் காட்சிகளை படத்தில் வைத்து கலாச்சார சாதனை படைத்த ஐஸ்வர்யா இந்தப் படத்திலும் அது போன்ற காட்சிகளை வைக்க தவறவில்லை. கதாநாயகி பிரியா ஆனந்த் குடித்துவிட்டு தள்ளாடியபடியே பப்பில் இருந்து வெளியே வருவது போன்ற காட்சியை வைத்திருக்கிறார். படத்தின் முதல் பாதியை கலகலப்பாக சுவாரஸ்யமாக நகர்த்தியவர் இரண்டாவது பாதி சீரியஸ் கதை என்பதாலோ என்னவோ சற்றே திணறியிருக்கிறார். படத்தின் கதையை தனுஷ் உடன் இணைந்து கவுதம் கார்த்திக் நடிக்கப் போவது போன்று முடித்திருக்கிறார்கள். ஒருவேளை ஐஸ்வர்யா தனுஷ் அடுத்து தனுஷ் கவுதம் கார்த்திக்கை வைத்து அடுத்த படத்தை இயக்குவார் என்பது மட்டும் தெரிகிறது.